अनुभव

जाणीव सामाजिक सेवा संस्था , पनवेल व रोटरी क्लब ऑफ पनवेल सनराईज या दोन्ही संस्थांच्या संयुक्त विद्यमाने दिनांक ९/११/२०२६ रोजी वीटभट्टी कामगारांच्या झोपडीतील अंधार किंचितसा दूर करण्याचा एक उपक्रम संपन्न झाला.

सुप्रभात आणि नमस्कार,

काल *एक घास वंचितांसाठी* हा आपला दरवर्षीचा उपक्रम अतिशय उत्साहात संपन्न झाला. आपले विश्वस्त बाळकृष्ण आंबेकर यांनी याबाबतची माहिती फोटोसहीत कालच आपल्या या ग्रूपवर दिली आहे.

काल उपस्थिती खूप छान होती.

अध्यक्ष, उपाध्यक्ष, सचिव, खजिनदार, चार विश्वस्त, तीन सदस्य, एक युवा स्वयंसेवक आणि एक परिवारातील सदस्य असे तेरा सदस्य आणि रोटरीचे सदस्य उपस्थित होते.

सर्वच सदस्यांनी अतिशय उत्स्फूर्तपणे आपला सहभाग नोंदवला. आपल्या सदस्यांव्यतिरिक्त वीट भट्टीवरील कामगार वर्ग आणि त्यांची मुले अशी सुमारे ६० जणांची उपस्थिती होती. आपले आजीव सदस्य आणि रोटरी क्लब ऑफ पनवेल सनराईजचे अध्यक्ष के. बी. पाटील व बाळकृष्ण आंबेकर यांच्या मेहनतीमुळे कालचा उत्कृष्ट प्रतीचा दिवाळी फराळ आपण या बांधवांना आणि मुलांना देऊ शकलो. सर्व सदस्यांनी खूप सारे कपडे, भांडी आणून या बांधवांना वाटप केले. सर्व सदस्यांनी या बांधवांसमवेत दिवाळी फराळ करून आपला आनंद द्विगुणित केला. निसर्गाच्या सानिध्यात एकत्रित बसून दिवाळी फराळ करण्याची मजा आणि समाधान काही औरच होते .

आपली युवा स्वयंसेविका कु सान्वी चौबळ हिनेही अगदी उत्स्फूर्तपणे सहभाग घेतला. या निमित्ताने तिला पुष्प देऊन सन्मानित करण्यात आले. तसेच हा उपक्रम ज्यांच्या माध्यमातून संपन्न झाला त्या ढोके परिवारातील अर्चना आणि तिचे आई बाबा यांचाही पुष्प देऊन सन्मान करण्यात आला.

या वीट भट्टीवर झाडाखाली भरविण्यात येणाऱ्या शाळेतील विद्यार्थ्यांच्या खिचडीसाठी तांदूळ, डाळ आणि तेल अशी सामग्री आपण श्री ढोके यांचेकडे सुपूर्त केली. *आपले सचिव श्री रुपेश यादव यांनी देणगीद्वारे या अन्नधान्य सामग्रीचे प्रायोजकत्व केले आहे. रुपेश यादव यांना मनापासून धन्यवाद*

कार्यक्रमाचे सुरेख सूत्र संचालन जाणीवच्या विश्वस्त सौ अक्कलकोटे यांनी केले. या उपक्रमाच्या निमित्ताने मी,विश्वस्त महेश मुद्रस, रोटरी प्रेसिडेंट काशीराम पाटील यांनी आपले मनोगत व्यक्त केले आणि सर्वांना दिवाळीच्या शुभेच्छा दिल्या.

एकंदरीत आपला उपक्रम छान संपन्न झाला. दिवाळी असल्याने काही सदस्य त्यांच्या पूर्व नियोजित कामामुळे येऊ शकले नाहीत.

*दिनांक २२ नोव्हेंबर रोजी आपला सूर जाणिवांचा हा संगीत कार्यक्रम शांतीवन येथे होणार आहे. त्यावेळी दिवाळी संपली असेल आणि रविवारही असल्याने सर्वांनी उपस्थित रहावे, ही विनंती* या कार्यक्रमासाठी आपल्या सदस्या प्रतिमा मेहनत घेत आहे. ज्यांनी सहभाग घेतला आहे त्यांनी त्यांच्या संपर्कात राहून त्यांना सहकार्य करावे. अजूनही कुणा सदस्यांना या कार्यक्रमात सहभाग घ्यायचा असेल तर प्रतिमा जाधव यांच्याशी संपर्क साधावा. आपल्या कुटुंबातील सदस्यांपैकी कुणीही सहभाग घेऊ शकतो.

सूर जाणिवांचे हा आपला कार्यक्रम यावर्षी लेप्रसी कॉलनीमधील रहिवाश्यांना समर्पित आहे.

सुधागड एज्युकेशन सोसायटी पाली संचलित माध्यमिक विद्यालय केवाळे तालुका पनवेल येथील इयत्ता ५ वी ते १० वी च्या विद्यार्थ्यांसाठी गणपती सुट्टीतील विद्यार्थी हिताचा उपक्रम म्हणून पर्यावरण पूरक घरगुती गणेशोत्सव स्पर्धेचे आयोजन ऑनलाइन पद्धतीने करण्यात आलेले होते. या स्पर्धेसाठी केवाळे विद्यालयाचे मुख्याध्यापक , श्री. ढोले सर आणि विद्यालयातील सर्व शिक्षक - शिक्षकेतर कर्मचाऱ्यांनी विद्यार्थ्यांना स्पर्धेसाठी प्रोत्साहित करून तब्बल ५२ विद्यार्थ्यांनी या स्पर्धेत सहभाग नोंदवलेला होता.

सण उत्सवाचे औचित्य लक्षात घेऊन पर्यावरण विषयाची जनजागृती विद्यार्थ्यांच्या माध्यमातून घराघरात करता यावी यासाठी जाणीव सामाजिक सेवा संस्थेचे अध्यक्ष श्री विजय गोरेगावकर यांनी जाणीव सामाजिक सेवा संस्थेच्या सर्व विश्वतांसमोर कल्पना मांडली. अध्यक्षांच्या या स्तुत्य कल्पनेला मूर्त रूप देण्यासाठी जाणीवचे विश्वस्त ॲड गिरीश दळवी यांनी पुढाकार घेऊन प्रकल्प समन्वयक या भूमिकेतून विद्यार्थ्यांच्या वयोगटाचा विचार करून सुलभ असा गुगल फॉर्म तयार केला होता. या गुगल फॉर्म द्वारे वैकल्पिक प्रश्नांची उत्तरे विद्यार्थ्यांनी सोडवावीत आणि स्पर्धेला पूरक निवडक फोटो विद्यार्थ्यांनी आपल्या पालकांच्या मदतीने अपलोड करावेत असे सर्व विद्यार्थ्यांना गणपती सुट्टी आधीच सर्व शिक्षक आणि जाणिवेचे सदस्यांनी शाळेत जाऊन विद्यार्थ्यांना माहिती दिलेली होती. यासाठी जाणिवेचे सर्वच विश्वस्तांनी आपापली मते व्यक्त करत गुगल फॉर्म भरण्याचा डेमो दिला नंतरच विद्यार्थ्यांच्या वर्ग शिक्षकांच्या मार्फत सर्व विद्यार्थी आणि पालकांच्या मोबाईलवर गुगल फॉर्म ची लिंक पाठवण्यात आली.

केवाळे विद्यालयातील प्राचार्य , शिक्षक शिक्षकेतर कर्मचारी आणि जाणीव चे विश्वस्तांनी पाठपुरावा करत या अनोख्या स्पर्धेत विद्यार्थ्यांना जास्तीत जास्त सहभागी केले. यासाठी श्री विजय गोरेगावकर , श्री आंबेकर साहेब , श्री ढोले सर , सौ , शेंडे मॅडम , श्री प्रेषित पवार सर यांनी विशेष परिश्रम घेतलेत.

एकूण ५२ विद्यार्थ्यांनी अतिशय प्रामाणिकपणे या स्पर्धेच्या गुगल फॉर्मला प्रतिसाद दिला नि जाणीव सदस्यांना गुगल फॉर्म परिक्षणाची संधी उपलब्ध झाली. ५२ पैकी ४७ विद्यार्थ्यांचे गुगल फॉर्म स्पर्धेसाठी पात्र ठरवले गेले त्यातील सर्वोत्तम प्रतिसाद लाभलेल्या दोन विद्यार्थी सर्वोत्तम पहिल्या स्पर्धकांना रोख १०००₹ , सन्मानचिन्ह , अग्निपंख हे पुस्तक , गुलाबपुष्प व प्रमाणपत्र तर दुसऱ्या क्रमांकाला रोख ७००₹ , सन्मानचिन्ह , प्रज्वलित मने हे पुस्तक , गुलाबपुष्प व प्रमाणपत्र देऊन त्यांचा यथोचित गौरव केला गेला तर इतर ४५ विद्यार्थ्यांना सहभाग प्रमाणपत्रांचे वितरण करण्यात आले.

सर्व ४७ विद्यार्थ्यांचा गुणगौरव व पर्यावरण जागृती या दुहेरी हेतूने शनिवार दिनांक २४ ऑक्टोबर २०२६ रोजी सकाळी ९:३० ते ११ या वेळेत माध्यमिक विद्यालय केवाळे येथील सभागृहात जाणीव सामाजिक सेवा संस्थेचे अध्यक्ष श्री विजय गोरेगावकर , उपाध्यक्ष श्री सुबोध दिवेकर सर , विश्वस्त श्री संजय पाटील , श्री , आंबेकर , श्री काशिनाथ पाटील सौ. शिळवणे, श्रीमती प्रतिमा जाधव आणि कवाळे विद्यालयाचे प्राचार्य श्री ढोले सर या मान्यवरांच्या शुभ हस्ते सर्व विद्यार्थ्यांना प्रशस्तीपत्र देऊन गौरवण्यात आले. यावेळी श्री आंबेकर यांनी प्रास्ताविक केले प्रा संजय पाटील यांनी स्पर्धेचे वैशिष्ट्ये सांगितले तर श्री गोरेगावकर यांनी स्पर्धेतील विद्यार्थी आणि शाळेतील सर्व स्टाफ यांचे योगदान आणि जाणिवेचे उद्दिष्टे आपल्या भाषणातून नमूद केले. विद्यालयाचे प्राचार्य श्री ढोले सर यांनी जाणीव संस्थेच्या या अनोख्या उपक्रमाचे कौतुक केले शिवाय अशाच नवकल्पना असलेल्या स्पर्धा किंवा उपक्रम विद्यार्थ्यांसाठी राबविण्याचा मानस व्यक्त केला. या बक्षीस वितरण समारंभ प्रसंगी विद्यालयातर्फे सर्व जाणीव सदस्यांचे यथोचित स्वागत करण्यात आले .यावेळी प्राचार्य ढोले सरांना एक ग्रंथ जाणीव तर्फे भेट देण्यात आला. समारंभाचे प्रभावी सूत्रसंचालन सौ. पूनम म्हस्के मॅडम व आभार प्रकटीकरण सौ. शेंडे मॅडम यांनी केले.